ბინის კომფორტულობა, პრაქტიკულობა და სილამაზე, სულაც არ არის დამოკიდებული მის კვადრატულობაზე. თანამედროვე დიზაინერული გადაწყვეტილებების წყალობით, პატარა ბინები თანდათან იქცევა მყუდრო და კომფორტულ საცხოვრებლად.

მაშ ასე, როგორ მოვაწყოთ პატარა ბინა:

1. შეუმჩნეველი შესანახი სისტემა
როდესაც სივრცე შეზღუდულია, თითოეულ კვადრატულ მეტრს დიდი ფასი აქვს. მაგრამ, მიუხედავად ამისა შესანახი სისტემა ზედმეტი არასდროს არის. ამიტომ, ამ დროს უნდა გამოიყენოთ შეფარული შესანახი სისტემა, რომელიც არ იქნება თვალში საცემი და არ გადატვირთავს ინტერიერს. 

2. სწორი ავეჯი და გონივრული განლაგება
უმრავლესობას ჰგონია, რომ პატარა ოთახისთვის პატარა გაბარიტების ავეჯი უნდა შეარჩიოს.
შეცდომაა, რომ პატარა ავეჯი ოთახს ვიზუალურად ზრდის. ზოგჯერ პატარა ნივთების დიდ რაოდენობას სივრცეში სიმძიმე და ქაოსი შემოაქვს. მნიშვნელოვანია ავეჯსა და ინტერიერის სხვადასხვა ზომის დეტალებს შორის ბალანსი მოიძებნოს. პატარა სივრცეებისთვის უმჯობესია ავეჯის შეკვეთით დამზადება, ის ოთახის კონფიგურაციას მაქსიმალურად მოერგება. 

3. გააკეთეთ არჩევანი ჟალუზის სასარგებლოდ 
თუ თქვენ ფარდასა და ჟალუზს შორის არჩევანის გაკეთება გიწევთ უპირატესობა ჟალუზს მიანიჭეთ. უკანასკნელის ალტერნატივად კი რომაული ფარდების გამოყენება შეგიძლიათ. სტანდარტული ფარდისგან განსხვავებით ის სივრცეს არ ამძიმებს და ფანჯრის ორივე მხარეს დარჩენილი თავისუფალი ადგილის გამოყენების საშუალებას იძლევა. 

4. სწორი ზონირება
სივრცის ვიზუალურად აღსაქმელად ზონირება ძალიან მნიშვნელოვანია. არსებობს ზონირების მრავალი სისტემა, კარგად ჩამოყალიბდით, რომელი ვარიანტი არის თქვენთვის შესაფერისი და მხოლოდ ამის შემდეგ მიიღეთ საბოლოო გადაწყვეტილება. 

5. მეტი შუშა და მეტი სარკე
ყველა მასალას განსხვავებული თავისებურებები აქვს: ხე სივრცეს სითბოსა და მყუდროებას მატებს, ბუნებრივი ქვა – სიმდიდრესა და ელეგანტურობას, შუშა კი პატარა სივრცეების საუკეთესო მეგობარია. დიდი ფანჯრები, შუშის კარი და ტიხრები, ავეჯი - ყველაფერი ეს პატარა ფართს ნათელსა და ჰაეროვანს ხდის.
ასევე სივრცის გაზრდაში დიდ დახმარებას გაგიწევთ სწორად განაწილებული სარკეები. 

6. ნათელი ტონები 
ყველამ იცის, რომ მუქი ფერები ავიწროვებს სივრცეს, რაც დაუშვებელია პატარა ბინებში. ამიტომ, რემონტის დროს განსაკუთრებული ყურადღება უნდა დაუთმოთ ფერთა გამის შერჩევას - ეს შეიძლება იყოს როგორც მშვიდი და ნეიტრალური ფერები, ასევე მკვეთრი და ნათელი ტონები, რომლებსაც სივრცისთვის სიღრმის, მოცულობისა და ინდივიდუალურობის მინიჭება შეუძლიათ.