უძრავი ქონების ფასები მუდმივად იცვლება, დღეს თუ ბინა გაქვთ გაგიმართლათ, რადგან ფლობთ აქტივს, რომლის ფასიც ყოველდღიურად იზრდება. 2024 წლის პირველ კვარტალში გაყიდული ბინების ჯამური რაოდენობა წლიურად 2.7%-ით შემცირდა, რაც ნაწილობრივ გასაყიდად დარჩენილი ბინების შემცირებულმა რაოდენობამ განაპირობა. თბილისის უძრავი ქონების ბაზარზე ყველაზე დიდ მოთხოვნას საქართველოს მოქალაქეები ქმნიან, რასაც მთლიანი გაყიდვების 85%-ს უჭირავს. ამასთან, მნიშვნელოვანი 4%-იანი წილი უკავია ჯამურ გაყიდვებში რუსეთისა და ისრაელის მოქალაქეებს. დღეს ბაზარზე არსებული მდგომარეობით, შეგვიძლია ვთქვათ, რომ უძრავ ქონებაზე ძლიერი მოთხოვნა ნარჩუნდება. 2023-24 წლებში დაწყებული პროექტების თითქმის ნახევარი უკვე სრულიად გაყიდულია. გარდა ამისა, პროექტებში რომლებიც 2024 წელს სრულდება, დარჩენილია გასაყიდი ბინების მხოლოდ 18%. 

გაყიდული ბინების რაოდენობა და ბაზრის ზომა

2024 წლის პირველ კვარტალში თბილისში სულ 9506 ბინა გაიყიდა, რაც 2023 წლის პირველ კვარტალთან შედარებით 3%-ით შემცირებული მაჩვენებელია. აღსანიშნავია, რომ ჯამურად აღნიშნულ კვარტალში 717.4 მლნ აშშ დოლარის ღირებულების უძრავი ქონება გაიყიდა (+2.5% წ/წ და - 2.4% წ/წ, შესაბამისად). ახალ პროექტებში ტრანზაქციების 4%-იანი ზრდა დაფიქსირდა, ხოლო ძველ პროექტებში 2023 წლის პირველ კვარტალთან შედარებით მაჩვენებელი 16%-ით შემცირდა. პირველ კვარტალში თბილისში ახალაშენებული ბინების საშუალო შეწონილი გასაყიდი ფასი:

• გარეუბნებში 8%-ით გაიზარდა;
• ფართო ცენტრში კი 3%-ით შემცირდა;
• ხოლო ქალაქის ცენტრში ცვლილება არ დაფიქსირდა.

რაც შეეხება ძველ ბინებს - მათი საშუალო შეწონილი გასაყიდი ფასი 2024 წლის პირველ კვარტალში გარეუბნებსა და ფართო ცენტრში 10%-ით, ქალაქის ცენტრში კი 7%-ით გაიზარდა. 

ბინის ღირებულება

სტატისტიკის ეროვნული სამსახურის ინფორმაციით, წინა კვარტალთან შედარებით საცხოვრებელი უძრავი ქონების ფასების ინდექსი (RPPI) 1.1%-ით გაიზარდა, ხოლო ინდექსის წლიურმა ზრდამ 13% პროცენტი შეადგინა, რაც 2020 წლის საშუალოსთან შედარებით 41.3%-ით არის გაზრდილი. 2024 წლის პირველ კვარტალში ახალაშენებული (დასრულებული) საცხოვრებლის სეგმენტში 1 მ2 მედიანური ღირებულება უბნების მიხედვით ასეთია:

• მთაწმინდა - 5578 ლარი;
• ვაკე - 4866 ლარი;
• საბურთალო - 3837 ლარი;
• კრწანისი - 3585 ლარი;
• ჩუღურეთი - 3473 ლარი;
• დიდუბე - 3446 ლარი;
• ნაძალადევი - 3383 ლარი;
• ისანი - 3338 ლარი;
• გლდანი - 3200 ლარი;
• სამგორი - 3041 ლარი.

ქირა

2024 წლის პირველ კვარტალში თბილისში საშუალო ზომის ბინის ქირამ კვადრატულზე 9.9 აშშ დოლარი შეადგინა, რაც თვიური 0.2%-იანი შემცირებაა. აღსანიშნავია, რომ 2023 წლის დეკემბრიდან მოყოლებული ბინის საშუალო ქირას კლების ტენდენცია ნარჩუნდება. 

სამშენებლო ნებართვები

საქართველოში 2024 წლის პირველ კვარტალში გაცემული სამშენებლო ნებართვების ოდენობა 13.5%-ით გაიზარდა და 2 492 დეკლარირებულ ნებართვას მოიცავს. ჯამურად გაცემულია 2 314.6 ათასი კვ.მ ფართობის შენობა-ნაგებობების მშენებლობის ნებართვა, რაც 2023 წლის ამ პერიოდთან შედარებით 37%-ით გაზრდილი რაოდენობაა. გაცემული ნებართვების 74.3% მოდის საქართველოს 4 რეგიონზე:

• თბილისი - 48%;
• ქვემო ქართლის რეგიონი - 10.8%;
• მცხეთა-მთიანეთის რეგიონი - 7.9%;
• კახეთის რეგიონი - 7.6%.

აღსანიშნავი ფაქტია, 2024 წლის პირველ კვარტალში ნებართვები გაიცა მრავალფუნქციური საცხოვრებელი კომპლექსების, სავაჭრო ობიექტების, სასტუმროების, სამრეწველო საწარმოების, სასოფლო-სამეურნეო დანიშნულების ობიექტებისა და სხვა შენობა-ნაგებობების მშენებლობაზე.

ექსპლუატაცია

2024 წლის პირველ კვარტალში ექსპლუატაციაში მიღებულ იქნა 841 ობიექტი, რაც წინა წლის შესაბამის პერიოდთან შედარებით 22.1%-ით მეტია. ექსპლუატაციაში მიღებული ობიექტების ჯამური ფართი არის 805.1 ათასი კვ.მ, რაც წინა წლის პირველ კვარტალტან შედარებით 49.2%-იანი ზრდაა. ექსპლუატაციაში მიღებული ობიექტების ნახევარზე მეტი მოდის ქვეყნის 4 რეგიონზე, 39% თბილისზე, 14.6% - მცხეთა-მთიანეთის, 11.7% - კახეთისა და 9.3% - იმერეთის რეგიონზე.