ყველას გვინდა, რომ სახლში შესვლისას სიმყუდროვე და სისუფთავე დაგვხვდეს. როცა ოჯახის წევრი ოთხფეხა მეგობარიცაა, გამოწვევა ორმაგდება, თუმცა სწორი სტრატეგიით, იდეალური წესრიგის შენარჩუნება სულაც არ არის რთული.

ბეწვის კონტროლი - მთავარი მტერი

თუ სახლში ოთხფეხა მეგობარი გყავთ, ალბათ გეცნობათ გრძნობა, როცა დილით დალაგებულ იატაკზე შუადღისას ისევ ბეწვის "ბურბუშელები“ დაგორავენ. ბეწვი მარტო სილამაზის ამბავი არაა - ის მტვერს იკრავს და ჰაერსაც ამძიმებს.

დავარცხნა, დასუფთავების ნახევარია - წარმოიდგინეთ, რომ ყოველი ბეწვი, რომელსაც სავარცხელზე მოაგროვებთ, არის ერთი ნაკლები ბეწვი თქვენს დივანზე, ხალიჩასა თუ სხვა ნივთებზე. განსაკუთრებით გაზაფხულსა და შემოდგომაზე, როცა ცხოველები "მოსასხამს იცვლიან“, დავარცხნა ყოველდღიურ რიტუალად აქციეთ. ეს მათთვის მასაჟია, თქვენთვის კი - სისუფთავე.

"სუფთა ზონის“ შექმნა შემოსასვლელში

სახლის სისუფთავე ზუსტად იქ იწყება, სადაც ფეხს შემოდგამთ. თუ ამ ზონას სწორად მოაწყობთ, ჭუჭყიანი თათების კვალს იატაკზე ვეღარ იპოვით.

ორმაგი ხალიჩის ხრიკი - ერთი ხალიჩა კარს გარეთ დადეთ (უხეში, რომელიც ფეხსაცმლიდან დიდ ტალახს აცლის), მეორე კი - შიგნით. შიდა ხალიჩა სასურველია იყოს ბამბის, რომელიც ტენსა და წვრილ ქვიშას მყისიერად იწოვს.

იქვე იქონიეთ წყლის პატარა შესასხურებელი და რბილი პირსახოცი. თუ ცხოველს თათებს შემოსვლისთანავე გაუწმენდთ, იატაკის ყოველდღე რეცხვა აღარ მოგიწევთ.

სათამაშოები და პირადი ნივთები

ცხოველის საწოლი, პლედი და სათამაშოები ყველაზე მეტ მტვერს, ბეწვსა და სუნს იწოვს. თუ ამ ნივთებს ყურადღებას არ მივაქცევთ, მთელი სახლის ხშირი დასუფთავებაც კი აზრს კარგავს.

მისი საწოლის ან პლედი კვირაში ერთხელ მაინც გარეცხეთ. ეცადეთ მაღალ ტემპერატურაზე (მაგალითად 60 გრადუსზე) გარეცხოთ, რომ ბაქტერიები და ალერგენები სრულად განადგურდეს. გამოიყენეთ უსუნო ან საბავშვო სარეცხი საშუალებები. ცხოველების ცხვირი ჩვენზე ბევრად მგრძნობიარეა და მძაფრი სუნამოს სუნი მათ აწუხებთ.

ავეჯის გადარჩენის სტრატეგია

როცა სახლში ახალი ავეჯი შემოგაქვთ, ცხოველისთვის ეს ახალი "სათამაშოა“ - ზოგს კბილის გასასინჯად უნდა, ზოგს კი კლანჭების მოსაკვეთად.

აი, როგორ დავაზავოთ ისინი:

კატებს ეზიზღებათ, როცა თათებზე რამე ეწებებათ. დივნის იმ კუთხეებზე, რომლებიც ყველაზე მეტად უყვარს, ცოტა ხნით მიაკარით ორმხრივი სკოჩი. რამდენჯერმე რომ მიეკრობა, იმ ადგილს საერთოდ დაივიწყებს.

კატებს არ უყვართ ფორთოხლის და ლიმონის სუნი. არსებობს სპეციალური სპრეები, ან შეგიძლიათ წყალში ცოტაოდენი ეთერზეთი გარეოთ და ავეჯს მიასხუროთ - თქვენთვის სასიამოვნო სურნელი იქნება, მათთვის კი "წითელი ზონა“.

ძაღლები, განსაკუთრებით ლეკვები, ავეჯს იმიტომ ღეჭავენ, რომ კბილები ექავებათ ან უბრალოდ მოწყენილები არიან.

"მწარე“ სპრეი - არსებობს სრულიად უსაფრთხო, მაგრამ ძალიან მწარე გემოს მქონე სპრეები (მაგალითად, მწვანე ვაშლის გემოთი). ერთი გასინჯვა და სკამის ფეხის ღეჭვის სურვილი დიდხანს გაუქრებათ.

სათამაშოების როტაცია - თუ ძაღლს მობეზრდა თავისი სათამაშო, ის თქვენს ფეხსაცმელზე ან ავეჯზე გადავა. კვირაში ერთხელ შეუცვალეთ სათამაშოები (ზოგი დამალეთ, ზოგი გამოაჩინეთ), რომ ყოველთვის ახალი ინტერესი ჰქონდეს.

ძაღლი, რომელიც კარგად გაისეირნებს და დაიხარჯება, სახლში მოვა და დაიძინებს. ავეჯს ძირითადად "ენერგიის მოზღვავების“ დროს აფუჭებენ.

სისუფთავე არ ნიშნავს ცხოველისთვის შეზღუდვების დაწესებას. მთავარია პატარა, ყოველდღიური ჩვევები, რომლებიც დიდ ენერგიას არ წაგართმევთ, მაგრამ სახლს მუდმივ სიმყუდროვეს შეუნარჩუნებს.